PATIOS VIVOS: aprender coa natureza no CEIP de Cervo.

 

Hai patios nos que se xoga e hai patios nos que tamén medran preguntas, descubrimentos e conciencia ambiental. No CEIP de Cervo queremos que o noso sexa deses lugares.

Concidindo co 30 aniversario de Voz Natura, este curso poñemos en marcha "Patios vivos: ecosistema de aprendizaxe", un proxecto para transformar o patio nun espazo máis verde, biodiverso e cheo de oportunidades para aprender.

Plantar, observar, investigar, coidar. Descubrir insectos, aves, plantas. Experimentar coa auga, coa terra e co paso das estacións. E sobre todo, aprender que a natureza non está lonxe: tamén está aquí, no patio do colexio, esperando a ser descuberta.

Animádesvos?

PEZAS ÚNICAS ENTREGADAS AO MUSEO DO MAR

Neste momento do curso académico, temos a actividade de creación das Pezas Únicas, onde cada neno/a deseña a súa para agasallar a todo aquel que se acerque (ao longo deste ano) ao Museo do Mar de San Ciprian. Este ano a maioría das aulas quixeron dar a coñecer unha tarefa moi importante e divulgala por todos os arredores:

COIDEMOS O PLANETA!!!

ENERXÍAS RENOVABLES: experimentamos e divulgamos.

O equipo de Voz Natura impulsou ao longo deste curso a actividade “Diario de experimentos”, integrada dentro do proxecto “Voces verdes: protexe o planeta, axuda ao futuro” e no programa de agrupacións escolares “Cada gota cuenta”. A través desta proposta, o alumnado deseñou e realizou distintos experimentos relacionados co cambio climático, o coidado da auga e as enerxías renovables, fomentando a aprendizaxe activa e a experimentación directa.

Entre as experiencias desenvolvidas destacaron a simulación do efecto invernadoiro, a contaminación acuífera, a creación de filtros para depurar auga contaminada e o estudo do impacto do aceite no mar. A actividade tivo como finalidade promover a conciencia ambiental, a responsabilidade cidadá e os hábitos sostibles, ao tempo que se desenvolveron competencias científicas e de comunicación.

Como peche da actividade, o alumnado de 6º compartiu os resultados e conclusións dos seus experimentos co alumnado de 2º, actuando como pequenos divulgadores científicos e favorecendo a aprendizaxe colaborativa.

LAND ART nos patios do CEIP de Cervo.

Con motivo da celebración do Día da Nai Terra, no CEIP de Cervo poñemos en marcha unha nova proposta para dinamizar os patios da man dos equipos de Voz Natura e Actividades Extraescolares: Land Art no recuncho de Pepe.

Ao longo de diferentes tramos horarios, o alumnado gozou dun espazo de creatividade empregando materiais naturais recollidos no entorno, como paus, pedras, follas, pétalos, flores ou mazorcas. Unha forma de conectar coa natureza desde o respecto e a imaxinación.

As creacións foron sorprendentes, cheas de cor e orixinalidade, demostrando que a arte tamén pode ser unha ferramenta para valorar e coidar o noso planeta. Unha fermosa maneira de render homenaxe á Terra e lembrar a importancia de protexela cada día .

RECOLLEITA DE REPOLO E COLIFLOR

 

O alumnado de infantil e primaria participou nestes días na recolleita dos produtos cultivados durante o inverno no invernadoiro escolar. Repolos e coliflores foron os protagonistas desta actividade, na que os nenos e nenas puideron comprobar o resultado do seu traballo e coidado da horta ao longo dos últimos meses. 

Posteriormente fixeron uso do composteiro para a recollida de restos orgánicos.

RECOLECTAMOS PATACAS DO INVERNADOIRO

Coa limpeza do último bancal no invernadoiro, o alumnado de Infantil levou unha gran sorpresa: descubriron unha planta… que tiña patacas!

Con moitísima ilusión, puxéronse mans á obra e recolleron a súa pequena colleita. Foi un momento cheo de emocións e aprendizaxes, xa que hoxe descubriron que tamén hai froitos que medran baixo terra.

Esta experiencia achegounos, unha vez máis, aos segredos da natureza, espertando a curiosidade e o respecto polo que a terra nos ofrece.

SAÍDA E LIMPEZA DO ENTORNO NATURAL DE SARGADELOS

Gústanos coidar o entorno natural que nos arrodea, e así o demostramos nunha saída a pé ao entorno natural de Sargadelos co alumnado do 1º e 2º ciclo de primaria.

Aproveitando esta experiencia, colaboramos na limpeza e recollida de lixo da zona, contribuíndo a conservar este espazo tan valioso. Ademais de gozar da natureza, o alumnado puido comprobar de primeira man a importancia de respectala e coidala.

Con pequenos xestos como este, aprendemos que o medio ambiente é responsabilidade de todas e todos, e que só así poderemos seguir desfrutando del e compartíndoo no futuro.

PLANTACIÓN DE CENORIAS.

 

Hoxe queremos destacar o gran traballo dos nenos e nenas de Infantil, que se converteron en pequenos horteláns por un día. Propuxéronse plantar cenorias… e así o fixeron!

Primeiro, organizaron o espazo marcando o lugar de plantación con rolos de papel, unha forma sinxela e sostible de delimitar cada semente. Despois, con moito coidado, plantaron as sementes directamente na terra do bancal.

Para rematar, regaron con mimo e responsabilidade, deixando todo listo para comezar o proceso de crecemento. Agora só queda unha parte moi importante: agardar con paciencia e seguir coidando.

Unha experiencia que lles achega á natureza e lles ensina o valor do esforzo, do respecto e dos tempos que marca a terra

LIMPEZA DAS XARDINEIRAS DO PATIO.

Seguimos dando vida ao noso blogue de Voz Natura con novas accións a favor do coidado do entorno. Nesta ocasión, o alumnado de 3º de primaria foi o encargado de levar a cabo a limpeza e preparación das xardineiras que adornan o patio escolar.

Con moito coidado e ilusión, retiraron restos de plantas secas, limparon a terra e deixaron todo listo para futuras plantacións. Esta actividade permitiulles coñecer mellor o proceso de mantemento dos espazos verdes e a importancia de coidalos día a día.

Ademais, aproveitaron para reflexionar sobre o valor da natureza no noso entorno máis próximo e a responsabilidade que todas e todos temos na súa conservación.

BRIGADAS VERDES MARZO

Coidar do noso entorno é unha responsabilidade compartida que comeza nos pequenos xestos do día a día. No noso centro, o alumnado do 3º ciclo demóstrao coa súa participación nas Brigadas Verdes, unha iniciativa que promove o respecto e o coidado do espazo común, e na que todo o centro está implicado.

A través destas accións, o alumnado toma conciencia de que cada pequeno xesto conta e que o coidado do medio ambiente depende da implicación de todas as persoas. Construír un patio limpo é tamén construír un futuro máis sostible.

MACETAS AUTORREGO RECICLADAS

No noso espazo de Voz Natura, o alumnado do 1º ciclo de primaria elaborou macetas de autorrego con materiais de refugallo como botellas de plástico. A actividade permitiulles aprender de forma práctica a reutilizar e reducir residuos.

Ao mesmo tempo, reflexionaron sobre o consumismo innecesario, entendendo que non sempre é preciso mercar cousas novas para crear. Con imaxinación, moitos obxectos poden ter unha segunda vida.

Co coidado das plantas, tamén reforzan o seu vínculo coa natureza e a importancia de protexela. Pequenos xestos que axudan a construír un futuro máis sostible 

RANATURA E O MISTERIO DAS ÁRBORES DO PATIO.

 

Os espazos verdes no noso cole están cheíños de árbores e arbustos e para dalos a coñecer un pouco máis, a nosa mascota Ranatura organizou, como actividade para conmemorar o día da árbore, un roteiro con búsqueda de pistas entre todas elas. Os nenos e nenas, organizados por grupos de todos os niveis, tiveron que seguir indicios para atopar distintas especies. Cada pista lévaos a observar follas, troncos, froitos ou cheiros. Aprenderon a diferenciar plantas comúns do seu entornomáis próximo. 

A actividade combinou xogo, exploración e aprendizaxe activa, fomentouse o traballo en equipo e a curiosidade pola natureza. Descubriron que no seu propio patio hai unha gran diversidade, reflexionamos sobre a importancia de coidala e respectala e entenderon que coñecer as especies é clave para poder protexelas.

Foi unha experiencia divertida e educativa en contacto directo coa natureza.

PLANTANDO LEITUGAS

Coa chegada da primavera, o alumnado de infantil participou na plantación de leitugas no invernadoiro.

Aprenderon a coidar a terra e a sementar con agarimo, descubriron o proceso de crecemento das plantas, traballaron valores como a responsabilidade e a paciencia, fomentouse o traballo en equipo...

O invernadoiro convertiuse nun espazo de aprendizaxe viva!!

PREPARANDO OS NOSOS SEMILLEIROS

A nosa mascota Ranatura estivo a observar ao alumnado de infantil na preparación dos primeiros semilleiros. Con moita curiosidade, coñeceron os materiais necesarios e como preparar a terra para acoller as sementes.

Ranatura está moi contenta, pois descubriu que estes nenos e nenas descubriron a importancia de sementar con coidado e agarimo. Pouco a pouco, foron colocando as pequenas sementes e regándoas con delicadeza. Aprenderon que a luz, a auga e a paciencia son fundamentais para ver medrar a vida.

Agora, cada día, achegaranse ao invernadoiro para observar os seus avances e Ranatura non lles perderá ollo!!

VISITA A METEOGALICIA

 

O alumnado de 5º e 6º realizou unha das actividades propostas dende o proxecto de Voz Natura: a visita a MeteoGalicia. Durante a visita coñeceron como se predice o tempo e o significado de conceptos traballados na aula como a choiva, o vento, as nubes, a temperatura e a humidade. Tamén viron instrumentos de medida do tempo e entenderon por que as prediccións son tan importantes para a nosa vida diaria. Incluso participaron no lanzamento dun GLOBO-SONDA!!

TALLERES ENERXÍA RENOVABLES

 

 

O noso alumnado participou en diferentes talleres sobre o aproveitamento da enerxía e sobre as enerxías renovables, coa colaboración de Naturgy. A través de actividades dinámicas e exemplos cercanos, aprenderon que son as enerxías renovables e por que son tan importantes para coidar o medio ambiente e disminuir os efectos do cambio climático.

Coñeceron e experimentaron con distintos tipos de enerxías limpas como a solar, a eólica e a hidráulica, descubrindo como podemos obter a enerxía a partir deses elementos naturais como a auga, o sol e o vento; e compartindo a idea de como o bo uso da enerxía pode axudar a reducir a contaminación do noso planeta.

PEQUENOS METEORÓLOGOS, GRANDES PREGUNTAS SOBRE O PLANETA NO CEIP CERVO

 

O alumnado de Primaria do CEIP de Cervo convirteuse en explorador da agua e do clima. Investigando os climas de España e de Galicia, descubriron que a agua é unha auténtica directora de orquestra: decide si vai calor ou frío, se chove moito ou pouco e se unha paisaxe é verde intenso… ou cor “deserto elegante”.
O alumnado reflexionou sobre como o uso irresponsable da auga e a contaminación afectan ao equilibrio do planeta, alterando climas, ecosistemas e a nosa vida diaria.
Estas investigacións  axúdannos a tomar conciencia da importancia que é coidar o noso planeta, e de que cada pequeno xesto pode contribuir a ese fin.

CALENDARIO SOSTIBLE NO CEIP DE CERVO

 

O Equipo de Dinamización da Lingua Galega  do CEIP DE CERVO promove, de novo, a elaboración dun calendario escolar. Este ano, tendo en conta os proxectos de Voz Natura e o  PDI deste curso, elaborouse con moita ilusión, o Calendario Sostible 2026, un proxecto no que  participou todo o alumnado e que nace co obxectivo de acercar os Obxectivos de Desenvolvemento Sostible (ODS) da Axenda 2030 ao noso día a día. A través desta proposta quixemos reflexionar sobre o mundo no que vivimos e sobre a importancia de coidalo.

Podedes descargalo pulsando no código QR.

Esperamos que vos guste e vos faga reflexionar para, xuntos, millorar a situación do noso planeta.

ADORNOS NAVIDEÑOS DE REFUGALLO #RetoReutilizamos

 

O alumnado do CEIP de Cervo, coa colaboración das súas familias, deseñou e elaborou adornos de Nadal empregando material de refugallo, fomentando a creatividade, o reciclaxe e o respecto polo medio ambiente.

O Concello de Cervo cedeulles unha árbore do parque que serviu para expoñer e presumir destes fermosos traballos, poñendo en valor a importancia dun Nadal máis sostible e afastado do consumismo.

Unha iniciativa que une escola, familias e concello para promover hábitos responsables e coidado do planeta.

Felices Festas!!!

LIBROS E NATUREZA

 

Os nenos e nenas de infantil descubriron e gozaron do entorno natural do CEIP de Cervo a través da observación e da lectura de contos como "Xaime e as landras" e "A figueira de Pelostortos", relacionando as historias coa natureza que os rodea.

Ademáis, plantaron carballos e desgustaron figos, vivindo unha experiencia de aprendizaxe en contacto directo co medio natural.

Canto nos gusta o noso patio!!!!